L'œil éteint, s' vieill piau tout, jonne,
I n'est point gai, l' vieux mineur !
Eun' fichelle artient s' marronne,
Et cha n'annonc' point l' bonheur.


I démeure avec és' fille ;
Ch'est li qui soign' les infants,
Il touille el' soupe éd'sus l' grille,
In bertonnant d' timps en temps.


I s'imbête, et cha l' tracasse,
Il n' peut pus sarcler s' gardin.
Quand el' pauv' vieux i s'abasse,
S' tiête all' tourn' comme un moulin.


Etr' toudis dins s' bac à chintes...
Incor s'il sarot marcher,
In irot boir, des bonn's pintes !
Mais i pourrot s'écrouler...


I n'oubli' fouque és' misère
Qu' quand ses infants sont tertous,
L' soir, à l'intour dé s' kdière,
Et qui lieu parl' des grisous.


I a tout vu dins les fosses
Ses sauv'tag's i sont curieux.
Leus coeurs palpit'nt, les tiots gosses,
In acoutant l' pauver' vieux.


In v'not l'quère à chaqu' minute
Quand arrivot d' z'accidints.
Combin d' coqs i-a fait la lutte
Avec l' grisou grin, dints ?


Il a tell'mint des blessures,
Qu'in n' sarot pus les compter.
Il est couvert ed' coutures,
Pir' qu'un ancien guernadier.


Si cha s'rot parmi l' mitralle
Qui s'arot si bin conduit,
Il arot d' plus d'eun' médalle ;
Mais il s'est battu dins l' nuit.


Va ! consol-té, brav' Batisse
Les rubans, t' les a d'sus t' piau.
n vot bien qu'tas du service
T' carcass', ch'est un vieux drapeau !